Unglingalandsmót UMFÍ, skráningarfrestur til miðnættis 26.7
Unglingalandsmót UMFÍ er ein stærsta fjölskyldu- og íþróttahátíð landsins og hefur sameinað börn, ungmenni og fjölskyldur víðs vegar að af landinu frá árinu 1992. Á mótinu keppa þátttakendur á aldrinum 11–18 ára í fjölbreyttum íþróttagreinum yfir daginn, skapa nýjar minningar með vinum og fjölskyldu og njóta stemningarinnar saman á glæsilegum kvöldtónleikum alla verslunarmannahelgina.
Ekki gleyma að skrá þig á Unglingalandsmót 2026
Skráning er í fullum gangi á Unglingalandsmót UMFÍ sem verður haldið á Sauðárkróki um verslunarmannahelgina. Mikilvægt er að passa að skrá sig á mótið og í greinar í tæka tíð. Opið er fyrir skráningu á mótið til miðnættis á sunnudagskvöld, það er 26. júlí. Það eru því aðeins vikan og helgin sem fólk hefur til stefnu.
Afar góð skráning er í fjölmargar greinar. Síðustu ár hefur verið gríðarlega vinsælt að taka þátt í kökuskreytingum. Á síðasta móti voru þátttakendur tæplega 500, sem kepptust að því að skreyta fallegustu og hugmyndaríkustu kökuna. Álíka margir voru í grasblaki í um 100 liðum, grashandboltinn var álíka stór grein og svo má lengi telja.
Pílukast hefur líka slegið í gegn en á Egilsstöðum í fyrra tóku um 300 manns þátt í keppni, um 80 í skák og hvorki fleiri né færri en 150 í krakkahreysti.
Afar góð skráning var sömuleiðis í frjálsar íþróttir, knattspyrnu og klassískar greinar mótsins. Miðað við skráninguna nú stefnir í heljarinnar fjölda á mótinu á Sauðárkróki.
Nóg verður í boði, tónleikar öll kvöld, fyrirlestrar fyrir foreldra um markmiðasetningu, leiki og heilsu, ofurhetjuhlaup fyrir yngstu mótsgesti, nóg að gera fyrir foreldra og eldri systkini og því ættu allir að geta fundið eitthvað við sitt hæfi.
Af nægu er að taka.
Allar upplýsingar um mótið og afþreyingu er að finna á umfi.is. Þar er hægt að kaupa miða fyrir þátttakendur. Auk þess þarf að kaupa aðgang að tjaldsvæði fyrir þau sem þess þurfa. Rafmagn fylgir með í kaupunum.
Upplýsingar og skráning á Unglingalandsmót
Ertu í vandræðum með skráninguna? Þú getur fundið leiðbeiningar hér: