VIÐTALIÐ - Eygló Björk eigandi Móðir jörð

Lestu flott viðtal við hana Eygló Björk, þar sem hún segir frá fyrirtæki sínu Móðir jörð og ýmsu fleiru. 

Fullt nafn: 

Eygló Björk Ólafsdóttir

Segðu okkur aðeins frá sjálfri þér og hvaðan ertu ?

Reykjavíkurmær langt aftur í ættir, fædd þar og uppalin. Var lengi í hestamennsku og hef alltaf haft sterka tengingu við náttúruna, var í sveit á sumrin svona eins og krakkar gerðu á Íslandi. Ég hef alltaf haft áhuga á tungumálum, hef ferðast mikið og hef starfað og búið í Sviss og á Ítalíu. Er svo heppin að vinna og áhugamál fara saman, þ.e. að búa til góðan og heilsusamlegan mat.

Menntun og við hvað starfar þú í dag ?

Viðskiptafræðingur frá HÍ. Í dag rekum ég og maðurinn minn, Eymundur Magnússon, Móður Jörð ehf sem er matvælafyrirtæki á sviði lífrænnar ræktunar.

Hver eru þín helstu áhugamál ?

Ferðalög, menning, matur og umhverfismál. Ég er grasrótarmanneskja líka, tók þátt í að stofna Slow food deild hér á Íslandi árið 2001 eftir að þau heilluðu mig í einni af Ítalíu heimsóknum mínum. Vil helst hafa alltaf eitthvað svona viðfangsefni til að þoka málum áfram í rétta átt.   

Bakgrunnur íþróttum og heilsurækt og stunda þú einhverja heilsurækt í dag ?

Á unglingsárum var ég lengi í handbolta og spilaði með Fram þar til ég fór í menntaskóla. Í dag geng ég mikið, syndi og hleyp af og til. Eins finnst mér mjög gott að gera jóga eða nokkrar pilates æfingar með því. 

Hafið þið Eymundur alla tíð búið í Vallanesi og búið þið þar allt árið um kring?

Eymundur er fæddur í Reykjavík líkt og ég og bjó þar framan af en hóf búskap í Vallanesi 1979. Við giftum okkur árið 2010, þá sagði ég starfi mínu lausu í Reykjavík og við fórum að vinna saman. Við búum mestan partinn í Vallanesi en höldum einnig heimili í Reykjavík, allt eftir árstíðum og hvernig verkefnin liggja hverju sinni.

Hvernig búskap stundið þið þar og hvað eruð þið með marga starfsmenn í vinnu þegar mest er ?

Við ræktum korn og grænmeti og framleiðum matvörur sem grundvallast á hráefni úr jurtaríkinu. Heilkornavörur úr byggi og heilhveiti, hrökkbrauð, sultur og grænmetisrétti s.s. grænmetisbuff, chutney og sýrt grænmeti o.fl. Einnig erum við með ferðaþjónustu í smáum stíl og rekum verslun á sumrin. Á ársgrundvelli eru starfsmenn 7 en í fullu húsi á sumrin eru 14 manns í Vallanesi, þ.e. starfsmenn, verknámsnemar og sjálfboðaliðar.     

Hvað metur þú sem stærsta framþróunarskrefið sem þið hafið tekið ?

Stækkun vörulínunnar sem átt hefur sér stað undanfarin ár, og við erum hvergi nærri hætt !

Hvernig er að vera bóndi á Íslandi ?

Í frjálsu umhverfi er það í stuttu máli frábært tækifæri að hafa land, aðstæður og forsendur til að skapa og láta reyna á sínar hugmyndir. Það ber einnig að hafa í huga að við önnumst alla fullvinnslu, markaðssetningu og dreifingu til viðskiptavina sjálf. Við erum því eins og hver annar matvælaframleiðandi, fyrir utan það að rækta okkar grunnhráefni það að auki. Það er auk þess góður lífstíll að rækta sinn eigin mat og hafa úr að velja fersku úrvals hráefni alla daga.

Fáið þið til ykkar ferðamenn og fyrir hverju eru þeir áhugasamastir ?

Við fáum í vaxandi mæli til okkar ferðamenn sem vilja kynnast starfseminni eða nýta sér gistimöguleikana hér. Margir koma til að versla vörur Móður Jarðar s.s. Íslendingar sem vilja sjá hvaðan varan kemur, en við höfum einnig ratað í erlend tímarit og handbækur sem ferðamenn notast við. Við bjóðum gestum okkar upp á íslenskan heilkorna morgunverð úr okkar hráefni sem borinn er fram í einu gróðurhúsinu, þetta er skemmtileg viðbót og vekur mikla ánægju. 

Eru einhverjar nýjungar í burðarliðnum sem þið getið sagt frá ?

Það er alltaf eitthvað í burðarliðnum, við erum um þessar mundir að betrumbæta allar umbúðir og vinna að nýjungum í sýrðu grænmeti og þróa vörur á grundvelli Perlubyggsins okkar. Eins bíðum við spennt að sjá hvort rúgurinn okkar nær fullum þroska, það telst þá til nýjunga í kornræktinni hjá okkur. Repjuolían opnar auk þess nýjar víddir fyrir okkur, íslensk matarolía er nýjung.   

Nefndu þrennt sem þú átt alltaf til í ísskápnum ?

Smjör, lífrænt ræktaðar sítrónur og bita af góðum osti. Að öðru leyti úrval af íslensku grænmeti auðvitað. 

Hver er þinn uppáhalds matur & matsölustaður ?

Ég er í vaxandi mæli grænmetisæta og takturinn þar ræðst dálítið eftir árstíðum t.d. hvað mig langar í. Uppáhalds matsölustaðurinn minn er Gistihúsið á Egilsstöðum sem er glæsilegur í allri umgjörð og matseld. 

Ert þú að lesa eitthvað þessa dagana og hver er besta bók sem þú hefur lesið ?

Núna er ég að lesa Vonarlandið eftir Kristínu Steinsdóttur. Fátækt fólk eftir Tryggva Emilsson er sennilega ein áhrifamesta bók sem ég hef lesið.    

Ef þú ætlar að „tríta“ þig sérlega vel hvað gerir þú ?

Mér finnst ég „tríta“ mig á hverjum degi.  Er í góðum félagsskap, borða góðan mat og hef skemmtileg viðfangsefni. Á ferðalögum væri það gott „hamam“ sem tekur nokkra klukkutíma.   

Hvað segir þú við sjálfa þig þegar þú þarft að takast á við stórt/erfitt verkefni ?

„Vertu róleg“!

Hvar sérð þú sjálfa þig fyrir þér eftir 5 ár ?

Gerandi það sem ég er að gera, þróa áfram og reka Móður Jörð með manninum mínum og kannski einhverjum fleirum.