Alþjóðlegi hamingjudagurinn 2016: Að yrkja hamingju

Alþjóðlegi hamingjudagurinn verður haldinn í fjórða sinn sunnudaginn 20. mars.

Dagurinn er haldinn að frumkvæði Sameinuðu þjóðanna með það að markmiði að vekja stjórnvöld og einstaklinga til vitundar um mikilvægi hamingjunnar.

Stjórnvöld eru hvött til að leggja meiri áherslu á að efla hamingju og vellíðan í samfélaginu og að þessi atriði séu höfð til hliðsjónar við allar ákvarðanir stjórnvalda.

Í tengslum við Alþjóðlega hamingjudaginn tekur Embætti landlæknis þátt í viðburði undir heitinu Að yrkja hamingju sem haldinn verður í Hannesarholti, Grundarstíg 10 í Reykjavík kl. 16 á sunnudag.

Dagskrá:

• Aðalsteinn Ásberg Sigurðsson flytur ljóð

• Bhikshuni Weisbrot flytur ljóð

• Gunnar Hersveinn flytur erindið Listin, frelsið og hamingjan

• Sigrún Daníelsdóttir flytur erindið Skiptir hamingja máli fyrir heilbrigði þjóða?

• Tríóið Reykjavik Centre Music Group flytur tónlist

Aðalsteinn Ásberg Sigurðsson, skáld, þýðandi, tónlistarmaður og útgefandi og eftir hann liggja ljóðabækur, bækur fyrir börn og fullorðna og ljóðaþýðingar á verkum margra helstu skálda samtímans. Síðasta ljóðabók hans með eigin ljóðum heitir Sjálfsmyndir og er frá árinu 2012.

Bhikshuni Weisbrot er skáld, ritstjóri og formaður rithöfundasambands Sameinuðu þjóðanna (United Nations SRC Society of Writers) og verður sérlegur gestur á þessum hátíðardegi. Weisbrot ásamt Elizabeth Lara og Darrel Alejandro Holnes ritstýrðu safni samtímaljóða undir heitinu Happiness: The Delight-Tree sem gefið var út á Alþjóðadegi hamingjunnar árið 2015 og mun hún lesa ljóð úr bókinni ásamt eigin ljóðum.

Gunnar Hersveinn er þekktur fyrir nálgun sína á málefnum líðandi stundar og hvernig við ræktum okkar innri mann.

Sigrún Daníelsdóttir er klínískur sálfræðingur og verkefnisstjóri geðræktar hjá Embætti landlæknis.

Reykjavik Centre Music Group er tónlistarhópur sem hefur sérhæft sig í tónlist Sri Chinmoy og hefur haldið fjölda tónleika og spilað undir m.a. í hugleiðslustundum og á viðburðum á vegum Sri Chinmoy miðstöðvarinnar hér á landi.

Erindi verða flutt bæði á íslensku og ensku. Aðgangur ókeypis og allir velkomnir!

Sigrún Daníelsdóttir
verkefnisstjóri geðræktar